दाङ । लुम्बिनी प्रदेशका मुख्यमन्त्री चेतनारायण आचार्यले प्रदेश सरकारले ल्याएको नीति तथा कार्यक्रममा युवालाई प्राथमिकतामा राखिएको बताएका छन । उनले नीति तथा कार्यक्रमकै आधारमा आगामी बजेट तथा कार्यक्रम तर्जुमा गरिने उल्लेख गर्दै युवामैत्री योजना तथा कार्यक्रमलाई थप प्रभावकारी बनाइने बताएका हुन ।
लुम्बिनी प्रदेश स्तरीय युवा सम्मेलन २०८३ को भालुबाङमा शुक्रबार उद्घाटन गर्दै मुख्यमन्त्री आचार्यले युवालाई उद्यमशीलता र आत्मनिर्भरतातर्फ उन्मुख गराउने उद्देश्यका साथ विभिन्न कार्यक्रम सञ्चालन गरिने बताए । प्रदेश सरकारले डिजिटल क्षेत्रलाई प्राथमिकतामा राख्दै युवा लक्षित कार्यक्रम अगाडि सार्ने तयारी गरेको उल्लेख गर्दै उनले युवालाई आधुनिक प्रविधिसँग जोडेर उद्यमशीलता विकास, रोजगारी सिर्जना तथा आत्मनिर्भरता प्रवर्द्धनमा विशेष ध्यान दिइने बताए ।
उनले लोकतान्त्रिक व्यवस्थाको रक्षा, राष्ट्रियताको संरक्षण तथा समाज रूपान्तरणमा युवाको भूमिका अत्यन्त महत्वपूर्ण रहेको बताए । समाज परिवर्तन र विकासको मुख्य शक्ति युवा नै भएकाले उनीहरूलाई सकारात्मक, सिर्जनात्मक र उत्पादनमूलक कार्यमा सक्रिय बनाउन आवश्यक रहेको उनको भनाइ थियो ।
मुख्यमन्त्री आचार्यले अधिकारको माग मात्र पर्याप्त नहुने भन्दै कर्तव्यप्रति पनि सचेत हुन युवालाई आग्रह गरे । समाज रूपान्तरण, सुशासन प्रवर्द्धन तथा समृद्ध समाज निर्माणका लागि युवाले आफ्नो भूमिका अझ प्रभावकारी बनाउनुपर्ने उनले बताए ।
उनले युवा पुस्ताको ऊर्जा, सीप र क्षमतालाई विकाससँग जोड्न सके प्रदेश तथा देशको समग्र विकासले थप गति लिने विश्वास व्यक्त गरे । युवालाई उत्पादन, नवप्रवर्तन र उद्यमशीलतासँग जोड्ने कार्यक्रम आगामी दिनमा अझ सशक्त रूपमा अघि बढाइने समेत उनले बताए ।
गैरसरकारी संस्था महासङ्घ लुम्बिनी प्रदेशकी अध्यक्ष जित कुमारी बेल्बासे ( सुशीला ) को अध्यक्षता तथा मुख्यमन्त्री आचार्यको प्रमुख आतिथ्यमा सम्पन्न कार्यक्रममा सामाजिक विकास मन्त्री जन्मजय तिमिल्सिनाले युवा क्षेत्रको समग्र विकासका लागि शिक्षा क्षेत्रलाई प्राथमिकतामा राखेर कार्यक्रम सञ्चालन गरिने स्पष्ट पारे । उनले गुणस्तरीय शिक्षा, सीप विकास र नेतृत्व क्षमताको अभिवृद्धि मार्फत युवालाई सक्षम, प्रतिस्पर्धी र आत्मनिर्भर बनाउने दिशामा प्रदेश सरकार केन्द्रित रहेको बताए ।
कार्यक्रममा नेपाल रेडक्रस सोसाइटी लुम्बिनी प्रदेशका अध्यक्ष कृष्ण पङ्गेनी, युनिसेफका प्रतिनिधि रिद्धी शर्मा लगायतले युवाको सहभागिता, नेतृत्व विकास तथा सामाजिक उत्तरदायित्वका विषयमा आफ्नो धारणा व्यक्त गरेका थिए ।
About The Author
थप
लुम्बिनी प्रदेश मन्त्रिपरिषद् पुनर्गठन, पाँच नयाँ मन्त्रीको शपथ
अनुगमन प्रभावकारी बनाउन जिल्ला समन्वय समिति सञ्चालन सम्वन्धित ऐन संशोधन आवश्यक : मुख्यमन्त्री आचार्य
लुम्बिनी प्रदेशमा भोलि सार्वजनिक बिदा